Save the world hunger?

我部門的最高領導人當遇到辣手問題時,經常說:“We can’t save the world hunger” 。我們真的是否不能“Save the world hunger”?

昨天看到60分鐘時事,其中一個專題就是“Save the world hunger”。近年來,許多世界志願團體組織都希望解決非洲小孩生存率低的問題。有關非洲小孩問題,其中最大因素是營養不良,電視上無時無刻都拍攝到非洲小孩擁有纖幼的手腳,但大大的肚子,都是因營養不足,母親自身的奶水缺乏小孩應吸收的養份,很多非洲小孩在小於兩歲便死亡。

在1999年,一名法國科學家André Briend發明了Plumpy’nut,主要成份為花生及其他高蛋白質的食品,容易處理及製作,成本也不是昂貴。無國界醫生組織已在非洲的醫療中心使用,記者訪問了其中一名無國界醫生,她極度推祟Plumpy’nut。她娓娓道來自己當無國界醫生的歲月,怎樣痛苦地看著無數的小孩子因營養不足而死去, Plumpy’nut對非洲小孩及其家人來說,是奇蹟、曙光。

當然,之後也許會由此而產另外一些問題(如人口增長、教育等),但我深信Plumpy’nut project是正確的,我們是要進步,不是因要解決新問題而放棄進步,畢竟,這是非洲小孩生存的希望。

希望,多些人會相信“We really can save the world hunger”,至少不要失去希望。

http://www.plumpynutinthefield.com/eng/index-eng.php

失蹤人口?

失蹤及無寫博的原因:

1) 忙到七彩
2) 病到九彩
3) 懶到死
4) 腦震盪
5) 唔想返工
6) 唔想見人
7) 自尊心趺至新底
8) 無睇戲
9) 無睇日劇

天呀!!我要啲正能量…..

結婚?

今天又八卦地週圍睇,見到人地談論要找個至少比自己多3571.4的男子結婚(http://lavendercheung.blogspot.com/ Sep 7, 2007),才不會比以前單身情況差。

首先,小師奶的知識範圍內只知都市閒情節目主持人,對新聞工作者有誰跟本不知道,所以張宏艷是誰、有那些出名的成就,小師奶根本不知。仿佛他們就如上流社會人士,一言一談都是小師奶無法理解的事,只有羨慕和自卑而已。

但她quote一份出自一段由中國理財網（http://www.cnlicai.net/family/4039763.html）的文章便有很大問題，文章用一些似是而非的理論去辯証女人要找一個至少多她3571.4的男子才可保證她往後的生活比單身好過。

我不會批評這財網，畢竟，它的“老闆”們都是用錢去衡量一切的機構，bias一定有，要不然便得罪老闆，資源便沒了。但新聞工作者這種小師奶以為高尚的行業也buy這概念就很有問題。

小師奶是個既簡單，不動腦的人，太複習的數字師奶不懂，只知若我要保證婚後比單身盆數的總資產多的話，去買六合彩應是首選。若把孩子的成本計算出來，所有人類應早在幾百年前絕種，因為on the book根本只有cost,投資高風險市場就算計埋虧本也不會如生仔般。

其實，自己也很反感恆生的廣告“四百萬供養小孩”,我也明白要瞭解養小孩是不容易,也需要基本要求 – 金錢。但是否四百萬才可養孩子,或四百萬就可以養好孩子是兩碼子事情,不可弄錯。

若要真的找個如網上所說的要求,相信和找個有錢、靚仔、又100%愛妳的人一般機會,有的話買六合彩也中,也不用找了。

生仔?

最近有些新聞關於虐兒個案,引起我個人某些回響。利益申報,因年紀關係,本人打從上年結婚以來已是積極地「做人」。但當瞭解受孕過程後,你會發現其實生孩子是件很難的事。雖然資料搜集自坊間網上討論區及一些網上教育,但相信也可反映很大程度的真實。

先決條件,當然是要有卵子和精子,Of course,精子(以availability計算)比卵子應該容易生產,雖不可說要有就有,但總不會像卵子一般,平均一個月只有一次。但可惡的卵子每月在甚麼時候出現,那就需要探測,香港許多女孩子都有月事問題,即說很少機會是正常地每二十八至三十天完成一週期,月事經常不準,大部份都是一個多月,或甚至隔一個月才有,所以要是妳屬於正常的一類,就已經屬於少數特殊類別。總括來說,坊間有兩種方法去計劃生育或避免懷孕:1) 基體溫度 2) 比林斯自然生育調節法。

基體溫度是每天早上醒來之後甚麼也不做,先量度體溫作記錄。從月事來的第一天計算,那段時間屬基體溫度,當體溫明顯下降時,意味可能是開始排卵期,大部份女性會在體溫明顯下降當天或之後兩天內排卵,未受精的卵子會在排卵開始一天後死亡,就是說卵子的壽命就只有24小時。那麼精子呢?若在環境許可下,大約只有一至三天的壽命。

用排卵紙是輔助作用,科學化一點,故名思意就是利用排卵時女性的LH分泌值量度當時是否排卵期。

比林斯自然生育調節法的原則是要觀察女性不同時段的黏液及內陰感覺的變化,在月經週期中,月經完結後,有一段時候女士應感到外陰濕滑的液體時,其實這就是可孕黏液,而這種黏液是由子宮頸細胞在排卵前６天左右的時間分泌出來的,透過每天觀察及記錄,女士應可掌握自己的生理時間及週期。

之前已說過,除非妳的週期是比常人短(少於二十八天),不然的話,卵子一個月內只會在某一天排出,然後在24小時內受精才能成孕, 精子要在可孕黏液來時才可存活兩或三天,否則正常精子只會在一至兩小時內死去.況且平常男士也難在一個月內每天都行房。那麼,每月妳就只有那3%懷孕機會.比入香港的大學機會(12%)還要低,一年的機會率是36%,比考CFA合格率低了3%(亞太區06年十二月份而言),而且,這不包括那些“不能控制”的因素,例如精子或卵子質素等等。

所以要成孕的話,不要只告訴我放鬆,不要刻意等沒用的說話。我絕對相信是特別運氣加上勤力的成果,成了孕話,就是代表妳運氣非凡(要不然的話可能跟多個性伴侶有關,每天不同的話,理論上也増加懷孕機會,相信廿六歲虐兒的四子之母可能是這狀況),希望真的要珍惜。

天使愛美麗?

今天國際台播映法國影片“天使愛美麗”,這影片對我來說是百看不厭。它是在我剛開始修讀法文的時候,雖然不是我第一套法國電影(因為2000已看了一套叫Les Rivières pourpres, 英文叫“Crimson River”),但也可算是我第一套法語電影。

吸引之處先是以文章的手法介紹每一位人物,每一新角色出場,先說此人喜歡和不喜歡的東西。愛美麗媽媽喜歡把手袋內的東西傾倒後再放得井井有條,不喜歡給別人碰到,也把每人的關係串連起來。其次,它把一些很平凡的東西變得很有趣,例如采用很多數字(哪條街道的幾幾幾號,幾多對情侶此刻忙碌做愛等),有點幾米feel。

最主要當然是令人相信平凡人可以做到不平凡的事,可能法國給我的印象太好,令我很容易相信及沉醉。片中相信每人都有一些遺憾,總可能是由一樣別人眼中微不足道的東西/行動(一個裝有年少收藏品的鐵盒交回物主)而掀起,最後在受施予者身上就變成了“奇蹟”。也把一些最初是很不平凡的事(拾來的相簿內出現的神秘人物相片),最後發現其實是平凡的事(那人是地鐵站即影即有機維修員,不是甚麼鬼魂)。

當然,影片本身也是充滿娛樂及戲劇性,攪笑點有許多,真是要乜有乜。但女主角之後的幾套法國電影,可能太深,也很慢,我不太懂欣賞。

“學校都無教”?

【摘自小玲網誌】

今天聽到有位朋友說她公司的故事,可和大家分享一下:

話說朋友A是小團隊的組長,因在大公司工作,旗下經常有新女上場,新女所指為剛大學畢業之女生。某日早上十時, 朋友A吩咐隊中的一位妹妹仔把一份文件傳到客戶辦公室,文件中包括了客戶公司信及地址, 朋友A便跟妹妹仔說:「呢個係你睇開阿客X嘅資料,佢哋要食晏前收到,你傳真俾佢啦。傳咗之後好快啲做埋阿客Y啲嘢,好趕架!」

「哦!」妹妹仔便回答,然後行開咗自己個位。

半小時過去, 朋友A經過妹妹仔個位,未見妹妹仔,朋友A徑自走到pantry倒茶…

又半小時過去, 朋友A再經過妹妹仔個位,仍未見妹妹仔,於是走去厠所「順應自然需要」….

再半小時過去, 朋友A仍未見妹妹仔,於是走到傳真機嗰度,見到妹妹仔,問:「你攪乜鬼咁耐呀?阿客Y啲嘢仲未做呀!」

「我仲未傳真到出去呀!條線好忙呀!」妹妹仔咁回應。

「你做乜唔set redial呀?」朋友A問。

「乜有嘅咩,orientation同training都無教。」妹妹仔理直氣壯咁回應。「依家set redial囉!點set架!」妹妹仔講完之後開始想搵manual。

「唔係嘛?依家人地等住要呀!」朋友A開始有點火。「阿女(其實朋友A只大她幾年),你可唔可以諗下點解決?」

「咁點做呀?我唔知噃!都無學過。」妹妹仔一副“受害人”+“唔關我事”嘅態度。

朋友A不知何解竟心平氣和地說:「你打人哋地址咁多次,人哋辦公室响邊?」

「樓下兩層囉!」妹妹仔回答。

「咁你應該响一個鐘頭前落樓下交俾個客啦!返上嚟仲可以做埋阿客Y啲嘢添!」朋友A都無咁好氣…

回音桶?

阿四公司有個回音桶,當你講一啲嘅時候,回音桶就會講:「係囉!」然後再重複你講嘅說話,攪到你以為自己思覺失調,有時仲以為自己响大峽谷講嘢。公司有段時間冷氣凍到不得了,有次阿四同另一位同事講:「我每日好似返醫院停屍間!」,不料聽到後面有把聲响起:「係囉!好似停屍間!」,阿四又講: 「凍死唔知有無得告公司呢?」跟住又有把聲話:「係囉!有無得告呢?」

回音桶另一方面也對公司所有資訊異常被吸引,喜歡當看到兩三人聚集一起時,便參加其中,也沒因未被邀請參與之事而感到尷尬,可能女性天生與八字結下不解之緣吧,但有時候她就會因此而化忽略自己Reception工作,如趕不上接電話或開門給訪客。

其實回音桶工作能力是絕無問題,是名副其實“阿四”(Office Admin),所以阿四是超常敬重回音桶的工作,亦對回音桶作出工作上的高度評價。但在私人範圍內,阿四絕不容許有此種人進朋友範圍圈,因為實在難受,對於“卿本佳人,奈何作桶”感無奈。

工廠與會計公司?

朋友在某大跨國會計機構做事,相信很多人也知道會計公司其實和深圳工廠無異,對比如下:

工廠:　一律穿制服
會計公司:　一律穿洋服（男西裝；女套裝）

工廠:　打咭返工
會計公司:　“嘟”咭返工（咪以為無記錄，只不過電腦化咗）

工廠:　組長職責記低每日工人幾時、去幾次厠所，用作月底扣糧嘅籍口
會計公司:　經理職責睇Time sheet，用作Annual Review 扣你bonus嘅籍口

工廠:　有週檢（週期檢查）或質檢（質量檢查）時先將啲不及規格零件／工作收埋,藏起不利証據
會計公司:　有客人要review cost sheet時先將啲其實係actual overtime嘅作業（tasks）刪走，改靚個timesheet去收埋啲低效率（inefficiency）或因決策者做錯預算(budget quotation)俾個客嘅証據

工廠:　每年五一勞動或十一國慶可以有假期回鄉
會計公司:　中或低層員工响紅日（假期）可以選擇响屋企／公司返工

工廠:　奉行多勞多得原則
會計公司:　 多勞未必多得

諸君可隨意選擇返工廠或返會計公司．．．．

後記：以前好似睇過一篇叫“坐監好過返工”，此篇可能有異曲同工之妙

厠所文化?

在星加坡出差時某商場女厠內看到此有趣的裝修,不知道男厠是否都是同款式。厠所是個雖切身(因每人也需要),但又不可完全開放透明的物件。厠所仿佛就是一所神秘的地方，也是充滿矛盾，既可以私人，亦可以公共／用。一個小小的空間，每人的佔用時間、方式可以大有不同，有些喜歡在這狹窄、充斥奇怪氣體的空間坐上幾小時，看書、溫習、甚至思考人生也有。它是用來大鳴大放、做大事、甚至是你的「繆思」女神（視乎你怎看），不是嗎？很多人在厠所內找到靈感。

其實厠所在人類文化中是代表了甚麼?先看歷史，在維基百科書內,說抽水馬桶早在公元前廿六世紀（大概軒轅黃帝時代）印加文化已存在,1596年由Sir John Harington為女皇伊利沙伯一世設計,但不大被英國人接受。經過歷年來的不斷改變、改良而演變成為今天的厠所。

在我國的歷史裡，當然也有「為解決自然需要的地方」，大多數人也知道茅厠此詞悠來已久，茅厠是用最簡單、原始的方式，也沒太大演變,通常都是一蓋遮頭,一坑/洞/桶讓污物有安身之所,沒跟西方般多元化。中國人一向都是實實在在，那管是每人、每天都做相同的事，沉悶不會是中國人怕的東西，所以我們可以忍受很多很多的事．．．

原來現代有一個名為世界廁所組織(World Toilet Organization，WTO)團體，總部在星加坡（好像很make sense），還有１７個國家的４７個國際團體組成，也包括中國、芬蘭等，１１月１９日還是世界廁所日（Oh!!嗰日好似係 Rebecca生日,Happy birthday to Toilet day and hers）。

世界廁所組織官方網站：http://www.worldtoilet.org/

女人?

女人是可以好狠,今天回家時,在大門前聽到一位四十來歲的女士,在電話的一頭盡力地咒罵另一端,那情景就像看她在健身室做了數小時的運動,那種不顧一切的樣子,令我有點害怕。

女人就是這樣子,她像是每次都要掏盡她的一切,去獲取她想要的東西,包括愛情、親人、甚至現代女性追求的事業。我作為女性,很相信其實女性最想要的,就是一個可信、可靠的人,令她可以放鬆地表現女性本有的嫵媚,無論是甚麼時代、甚麼年紀。

我好想…但…?

當你很想,很想得到一些東西的時候,期望就是過程中的一種極刑。每天過的時間就如一萬年,捱著幹的感受,真的極難過。

當結果出來時,很多人都認為盡了力,也該欣慰。鬼才信,那種不如意的難受、難過、你的心像給掏了出來。盡管你很想很想哭,但淚線跟腦部神經根本連不上。有嘗試過你的身體和自己分開了,如“給鬼按”的感覺嗎？

我真的很想，很想，只要一次，天呀！可以給我一次嗎？

天外有天?

信一成係小師奶隔鄰嘅部門嘅銷售員，「信一成」名稱係因為「信佢一成都死」。小師奶經常聽到佢同A部長講一，又同B部長講二。仲有佢成日講啲嘢好誇張，都唔知真定假。

信一成經常唔响辦公室，好鬼神秘，相信係要逃避啲客。有時我都佩服佢老細，對佢都無教訓過，不過外人未必知所有嘢嘅。

不過有一次佢老細都幽佢一默，話說有日小師奶幫忙攞一封信俾佢(都話我係阿四啦)，原來係公司VISA咭追錢信，本來出差用公司VISA咭找數，然後claim expense book，老細們就要review，無問題就approve。咁公司就會過數俾VISA咭銀行。如果遲咗遞交expense book，公司就會遲過數俾VISA咭銀行。

小師奶就問佢Finance charge點算，佢話無計啦，好似好無奈咁。唔知佢老細係唔係聽到，就同佢講:「信一成，我通常把Finance charge放到misc，我嘅原因係我老細成日唔响辦公室approve唔到，你嘅原因呢?」

如果小師奶老細咁同我講，我諗我會撞頭埋牆……

兩個BB?

當兩個BB係埋一齊,會係點?

以前說三個女人一個墟,那麼兩個BB又會是什麼?今天我感受到了，沒有想像中那麼糟，畢竟，兩個都是兩歲以下，一個牙牙學語，一個也只是剛步行得比較平穩。

兩人是表表親，香港小孩子很矜貴，年產不多，表表親也可以算很親了。觀察他們的活動，也許可以了解人類最純真的時候應該是怎樣，這種機會，比香港小孩年產還少得多。因為，香港小孩大部份在兩歲以後，純真已失，根本沒可能再擁有這本來該有的性情。

小女嬰比小男孩小，順理成為小表妹，看她初見小表哥那張担心害怕的面孔，毫不掩飾，噤若寒蟬。吃過了飯，氣氛好多了，是因為基本需要已滿足了，所以追求更高層次(social needs)？那真要問問Moslaw了。

午餐與BB吃也不錯（再大點的孩子不成！），我在期盼下次的BB約會。

港傭?

星期三嘅神秘電話談話內容:

「阿四,就咁,下星期响香港攪嘅Seminar呢,公司因為下半年要減少出差,所以星加坡市場部同事過唔到香港,雖然呢個Seminar唔關你事,但要你幫手喎。」

「哦。」

「咁嘅,拿,你去負責book場啦,訂房啦,攪banner啦,設計啦,發邀請函啦,安排座位啦,訂位啦…」

「哦。」

「掃地啦,抹枱啦,抹地啦…」

「哦。」

「迎賓啦,娛賓啦…」

「哦。」

唔關我事,但又要我幫手咁多嘢!!唉,真抵我死!!

病毒？

特別身體報告：注意注意！病毒現正影響閣下中輸神經，雖然閣下一星期內已經睇咗三次醫生，食足成個星期藥，仲係次次都要食足７色彩虹藥丸＋苦不堪言嘅藥水，病毒仍然自由地响閣下身體遊玩，請檢討一下自己生活方式。重複，請檢討一下自己生活方式！！特別報告完畢

頂！！幾時先可以好番呀！！

有時候?

有時候,我真很怕跟別人講話,透露自己的想法,
怕我的想法,跟他們不一樣,會被排擠。

有時侯,我會在人海思潮裡迷失,反問自己的想法是否正確,是否天真,是否不懂大體,是否跟別人眼中的我一致。

有時候,我會質疑自己是運氣,還是努力的成果,
讓我得到現在不錯的日子,幸福的生活。

有時候,我會轉進“牛角尖”中,放縱自己的多愁善感性格,
盡情發愁、發傻、發問,去等候給拯救。

其實,很多時候,我也很想有自己的一套完整的性格,不用去懷疑、迷失、
反問、轉“牛角尖”…..

抄襲?

今日好鬼得閒地响茫茫網絡裡一面"暢遊",發現最近有位博客嘅博文俾人抄襲,而抄襲人更給頭條日報頒獎以及包括在頭條出版嘅博客書中:
http://www.hkheadline.com/blog/reply_blog.asp?f=NISQBES2WJ5202&id=50953

事件發展到現在,頭條日報決定褫奪抄襲人得獎資格。在被侵犯版權者嘅博有許多支持者留言,好像是當初其實被侵犯版權者並不知道自己文章被抄襲,係有位支持者首先發現,予以通告。最後當然主辦單位不能漠視這種不正確嘅態度,褫奪抄襲人得獎資格。

我比較留意反而係網絡世界嘅Netzen Petro (我自己作,源自Citizen Petro concept),响茫茫網絡世界裡面,都咪話唔使有秩序。但要用幾多資源先夠,好鬼大噃!就算service provider,forum主持,都未必篇篇文都睇過哂啦,咁就要靠路人甲通告。網絡世界就好似原始時代未有什麼政府、法治去管制。靠嘅係人類本有嘅良知,去維繫社區嘅公平,去消除不公平、不正確嘅事,可幸係正義仍然存在。

我就唔多怕會被人抄,咁"史"都抄就真係世界滅亡,但都担心同輩博客嘅博文被人抄襲,真係好痛心嘅。

幹勁?

最近工作硬係提不起勁,實在好想唔撈, root cause係搵唔到工作嘅方向同快樂。自從轉組之後, 所有嘅嘢要重新學,總係覺得追極都追唔到。自信心開始下跌,感覺就好似同貞子鬥快爬出個井一樣,既恐怖,又絕望。可以未俾人炒,都算奇蹟。

其實成日寄CV,都係想搵番同工作拍拖嘅甜蜜同幹勁。我越嚟越覺得工作同戀愛真係好似,所要尋找嘅感覺好相近。 On the job搵工嘅感覺好似偷情,不能見光,但總忍不住上JobsDB、ClassifiedPost等淫媒結識第二個,覺得自己好變態。

萬幸係都搵咗好耐,發覺始終都係‘老妻’好,依家仲上多一層樓,當然工作嘅責任大咗,更加驚自己能力不及,但因為relocation嘅壓力好似少咗啲。雖然潛在危險仍然大, 但好似心情好咗。

好啦,要真係收心養性一排先…JobsDB、ClassifiedPost,得閒先搵你地….

天從人願?

小師奶依家做嘅工作,好多時候俾同事覺得好克人憎,都頗算厭惡性行業。因為小師奶係要減少公司不必要嘅流程、工序,希望改善公司嘅資源運作。但係由於好多因素:包括工作本身、做呢種工作嘅人措手、俾呢啲project影響過嘅同事、因project而認為自己地位俾影響到嘅阿ger,足以發出不少抗拒同怨氣,同貞子一樣:邊個有關都要死!!

雖然要做呢啲咁厭惡性行業,小師奶都要敬業樂業嘅,水能載舟,亦能覆舟, 能改善公司嘅嘢,唔代表一定全人類都係咁認為,同時,唔一定每個人都得到好處。私人企業,當然利字開頭,所以因個人因素而對project發出咒怨嘅怨人, 小師奶都幫唔到佢,因為阿公話要做,無人有得say no。

當然,有人亦會借刀殺人,又或者真係無知/無能力去做好個project,攪到天怒人怨,對下一個有心攪好個process嘅人就好唔公平。每人都有自己嘅agenda, 小師奶响依家呢份job特別可以見得多,有時都幾無心機,但受人錢財,就要消災,好彩係夠top management support,可以打退牛鬼蛇神。

其實,有時要天從人願,定係要人從天願先呢?

Transformers?

今日同老公走咗去睇Transformers，其實早在呢套戲未上之前，老公已經嚷著要睇，我就興趣不大｡

作為女性睇呢啲｢機械超人｣戲，其實都係陪多個享受｡不過今次有史提芬史匹堡，加Michael Bay (珍珠港､絕世天刧導演)，有影響我對此有興趣嘅｡
個人認為，成套戲唔算好大美國主義（原諒女性觀眾，首先未必注意什麼CG呀，打鬥場面呀），好多地方仲拿美國人係“鄉下佬"開玩笑,例一:Nokia係日本制造｡同時，亦好撐日本仔，所有高科技好嘅就係日本，有鬼主義就係北韓､蘇聯､中國｡劇情都好緊湊，因為主線都有幾條｡

講番CG同打鬥，咁就當然多（仲好鬼頭暈潻）！算係近期電影中一套值得入戲院睇嘅戲｡

Harry Potter熱?

就如香港近日嘅天氣一樣,哈利波特熱潮直迫三十多度高溫。今日因為上堂關係,要到佐敦,附近有間專賣中、大學嘅教科書(好似灣仔間集貴呀,又或者旺角嗰啲)。我响大約下午一點左右經過嗰度,抵死哋,門口有張食飯枱開咗,唔通熱得濟要响出面開枱食飯?

睇真啲,唔係噃,上面寫住”哈利波特已售完”。唔係嘛?呢間嘢都賣哈仔? OMG!!! 之前好似聽過英國好多非傳統嘅書店售賣哈仔,例如五金舖,車房(唔知真定假),真係唔見都唔知,我朋友仲話响書報攤買潻(之不過係嗰啲中環高級書報攤嚟嘅)。

小師奶都好喜歡哈仔嘅,之不過未去到即刻要買嘅地步。但不得不佩服出版社,實在用心理戰打得好。當然產品本身要有一定嘅吸引力,然後後加上”等待”、”期望”嘅心理,啲人就覺得好珍貴,因自己有付出。唔知哈仔最終係唔係真係咁好,但頭啖湯就肯定食硬讀者,相信响今個世紀風雲事件肯定有佢份。

肚痛?

都唔知攪"物"...肚痾幾日,好彩都係晚刻先嚟,但都好鬼辛苦!!

運氣?

呢幾日連續「好彩」地接收到幾封由不同機構發出嘅電郵通知我中咗什麼什麼五十至一百萬英磅嘅獎,其中一個更加用雅虎及Window名義。本來都應該馬上刪除呢類明知呃人嘅郵件,但小師奶心理太重,竟然發白日夢以為可能有0.1%係真 (唉,有時真係唔好話人哋係師奶,自己都係),電郵有名有電話,唔似唔真喎 。

好彩理智都仲未給朦閉,嘗試吓個電話先。吓!唔通嘅?一係通咗就斷線。再上網查下,一打雅虎及Window Lottery,用0.37秒已經找尋到一百五十萬個搜尋,好鬼多,先至知早在六至八個月前已有呢啲咁嘅scam, British Lottery 網址資料顯示:

(http://www.lottery.co.uk/info/scam8.asp), 電郵一方要求受害人俾一啲個人資料, 然後告知他們要先俾五千至七千英磅「手續費」, 你俾完之後又再有一封信問你再要多兩萬蚊, 封信由board member簽名, 好似好真咁。

小師奶終於都醒番,雖然都損失$(時間=金錢,浪費搜尋嘅時間,一開始應該馬上delete mail),但好彩最終都無財迷心竅,迫住安分守己,繼續專心工作。

尋找快樂的泉源?

這幾天响工作上遇到點挫折,又咁啱另一位我認為好睇得開嘅友人最近都有工作上嘅困難。「腎」起上嚟就响雅虎同Google找尋快樂的泉源。當打入search「快樂的泉源」時,雅虎就用咗0.37秒找到33,000個目標,而Google就用咗0.13秒找到191,000個目標(as of Jul 17, 07)。更有人响雅虎知識度發問此問題希望找到人幫忙俾料:"我要作一篇文章名叫《談快樂之道》。要議論文：論點，申論和結論"。(屬於小學五年班題目,有無攪錯,咁深!)

之前有套電影叫”The Pursuit of Happyness”,好多人都評論不錯。自己覺得個故事好平實,我諗因此大家容易有共鳴啩。每人對快樂嘅睇法都唔一樣,所以泉源都好不同。我希望可以工作同私人生活可以取得平衡,從中找到快樂。但好多時候兩樣嘢係inter-relate,好似好牙痛文學,我唔係天真度依家先知兩樣嘢係inter-relate,我不服係咁多年都找不到work响自己度嘅解決方法。有時想學其他人,但可能自己唔識modify,最終都係失敗。

開始覺得自己有點痴線,居然想响網上找快樂,好彩未會諗到網上尋真愛………

處長下台?

今日食飯，同事又談論「前」香港電台嘅處長新聞，當然焦點係: 處長應否躲在女公關身後問題。我覺得大部份人著眼點都係前處長「太蠢」，如果大方啲「唔好躲」，再撒個謊，或者好似「何博士」咁，直認不諱，佢認為咁叫大方，也有說法話其實前處長不必交代，因為係一件私人事。

唔知點解，我聽完咁多講法，都總係有啲覺得唔舒服，點解呢?我總係覺得，好似有點邏輯上嘅問題。我覺得何博士嘅答案當然唔駛深究，純粹攬嘢(天下正常小師奶，點會鍾意一個老公同幾個人分,咪攬笑啦!)。

但其他嘅說法，好似好奇怪，因為我覺得最重要嘅事好似無人談論過。如果處長真係「唔蠢」，唔躲在女公關後面，然後再撒個謊，又或者唔交代等，小師奶就有個疑問:咁係咪代表佢嘅做法無問題?

我同意佢唔駛向我、你、他人交代，但佢一定要同屋企人交代。而且，問我嘅話，佢呢件事一定係錯。無論係話什麼什麼逢場作慶，什麼什麼男人就係要咁，第一次之類之類……。咪講笑啦，錯就係錯。但係心寒嘅係:好似好多人都唔覺得呢件係主要事，相反，大家著眼响:依家世界係咁啦，男人咁係被接納嘅，最緊要係「醒目」。其實，我反而覺得，前處長如果係因為知道羞恥躲而在公關身後，我反而覺得佢可能仲有得救………

Role Model?

今日同啲好朋友食飯,的確賞心樂事.席間一位朋友素來好懂搞氣氛,天南地北嘅事,佢都可以吹一輪水。以前讀書嘅時候,好多時好似幾吸引到女仔,我某啲男性朋友都幾羨慕呢類型咁"講得"嘅性格,什至嘗試模仿同學習。但始終都係有成功,有失敗。

人係需要有模仿對象,鴨仔就會先跟住佢第一眼見到嘅生物。有時結果就係:走出嚟個樣未必同原本一樣。有啲朋友學到形似神不似,都幾恐怖。

成功嘅人生,可能要轉好多個models。有時要先找到啱自己,有時要自己modify。挫折就由此而生,好似我自己一樣。

有時都好羨慕嗰啲能stick with 自己性格,無論係天真.固執(當然底線係唔傷害別人),只要係自己嘅人生,點解唔可以?

後悔?

今日又係煲劇日子，睇嘅叫做｢求婚大作戰｣｡內容係男主角同女主角係青梅竹馬嘅朋友，因為時間，場地，種種原因，男主角响過去都不能向女主角告白｡响回顧過去啲相片slide嘅時候，上天賜男主角一個機會，派一個妖精（日文係咁翻譯），幫男主角回到相中嘅過去，重新再來，男主角會改變一啲嘢，令新一張相有所改變，女主角表情變得開心一啲，無悔一啲｡

其實，現實嘅我都有好多時候希望可以回到過去，將以前我覺錯嘅事更改，希望變成好事，好多人都可能有同樣想法｡男主角成日都總是不能勇敢,總是不能坦率,又不敢表達，老實講，自己有好多時都係｡

最後，男主角知道，其實與其懷念過去，其實要爭取現在仲好，雖然道理好似好顯淺，但真係好難做｡人生，難道一定要一啲遺憾先得．．．．

澳門？噢！

實在太久沒休息，難得有長假期，決定去澳門玩吓｡諗諗吓都好耐無去呢個地方，常有一種｢這麼近,那麼遠｣嘅感覺｡

想唔到澳門真係變化好大,我覺得唔係講呢幾年,係用月嚟計,好似突然間多咗好多娛樂場所､賭場､夜總會等等,但有個好得意嘅發現(可能係我個人認為),大部份呢啲地方都係未完全整理好就開始做生意,好似新葡京咁,連個頂蓋都未蓋好就已經急住開門做生意,咁究竟係construction project management做得唔好,定係新葡京嘅top management做主導話開呢?答案可能淺而易見…

講開澳門大型建築,都應該算係威尼斯人嗰檔超大型集結Resort, Casino同購物中心於一身嘅｢建築群｣,咁講一啲都無誇張,唔信真係去睇吓｡

好彩澳門以往獨有嘅｢古今同在｣都仲存在,你會發現一啲有幾百年嘅建築物响民居中間出現,感覺真係好特別...

搬寫字樓?

搬遷永遠都係最頭痛,淨係執都執傻.好似張相咁, 執file執到蜂巢咁,都算奇景….

點解咁忙？

唔知係咪自己真係越嚟越無用，啲嘢好似做極都做唔完｡但工作一浪接一浪，峰湧而來｡仲要經常出差於大陸同星加坡，兩地都肯定唔係我覺得可以｢寓工作於娛樂｣嘅地方，我寧願响香港開OT好過｡

講開星加坡同香港，好似一直以來都係世仇咁，互相競爭｡我身為香港人，明顯偏心｡星加坡有好多｢指導文章｣，有次我見有份報章叫星加坡人要表現星加坡係個有禮貌嘅國家，所有外地嚟嘅表演，就算幾差，都要鼓掌，不能柴枱，咁，其實同以前嘅大陸有分別咩？

但我覺得有一樣嘢香港遠遠不及星洲，就係唔多元化｡响香港，當一件事／物件係好紅嘅時候，全香港就只有呢件事／物件存在｡相反，如果唔再紅嘅時候，你想再搵到佢都好難｡所以香港人某程度上無論思想，世界觀等都會比較狹窄，因為單一資訊無可能有多元化嘅發展｡星加坡一個普通嘅商場，你都可以搵到一啲N年前嘅英文片，“Frankenstein’s bride”, “Dracula’s daughter”，响香港都唔知可以邊度搵到｡咁樣，香港都好易玩完，小心小心．．．．．

機場"特景"一則?

天下無免費午餐:呢處係香港機場其中一間餐廳,若要"享受"免費上網三十分鐘,請先"惠顧"飲食.若三十分鐘後想繼續免費上網?請"再次"惠顧飲食.

哈哈,幾好笑!對我呢種俾班機"突然"delay嘅滯留可憐人嚟講，都有啲苦中作樂feel.....

雙面人?

今日偶然觀看朋友個blog,發現好似同平時嘅佢唔一樣.blog內人比較理性.分享自己某啲想法時有板有眼.如果唔係知係佢,仲以為係另一個人.因為平日認識佢,都覺得佢嘅想法同常人有啲唔同. 佢經常當啲搵佢丁嘅人係朋友.想幫佢嘅通常都唔聽.但blog嘅佢好有理性.

可能我自己都係雙面,所以話,網絡世界真係不可盡信...

四諦?

上星期六去咗昂平３６０，仲去咗“與佛同行”館，雖然並非佛教徒，但有啲philosophy都幾有意思。

四諦　（摘自中文維基百科）

１）苦諦：說明世間有情悉皆是苦，即所謂有漏皆苦，詳見三苦、八苦；

２）集諦：造成苦的原因，即「貪」、「瞋」、「痴」三毒

３）滅諦：又名涅槃，明集諦理，斷盡煩惱業，則得解脫；

４）道諦：隨順趣向涅槃之道，詳見三十七道品。

四諦概括了兩重因果關係：集是因，苦是果，是迷界的因果；道是因，滅是果，是悟界的因果。

釋迦牟尼成道後，在鹿野苑（Sārnāth，現今波羅奈城Benares附近）初轉法輪，即為憍陳如等五位賢者宣講了四聖諦，五人各有所證悟，而求出家成為五比丘僧。

Unquote

首先，要知道世間本來就有苦(define the problem)，then, identify造成苦的原因(root cause)。Afterwards, 滅諦-解脫(find the resolution). Last, 道諦(sustain the process)。　原來，幾千年前已經有project management. Six Sigma? 行開啦！

岐視?

昨日响地鐵上車時,因對榴槤極為敏感,所以已感覺到有人帶咗個榴槤上車。我認為每人都有自己嘅喜愛權利,只要你嘅喜好唔會危害其他人,我唔覺得要好似星加坡咁,禁止携帶到公共場所。

有一位C奶响過咗N個站之後,先覺得有味,佢就同個friend E奶講:「一定係前面呢個賓妹有臭狐!」

我想同佢講,其實係我哋每人心中&個腦都有臭狐……
~～~～~～~～~～~～~～~～~～~～~～~～~～~～~～~～

同場加映：厠所金句　（兩則）

女士們，請勿把你每月的煩惱投入厠所內，是沖不走的！（一香港著名婚紗公司內）

你可以不洗手，但不可以不沖厠，請為他人著想！（一銅鑼灣食市內）

甚麼是幸福?

我好幸福,因為我老公每日都爭住早過我起床,讓我可以睡多幾分鐘。

我好幸福,因為我老公每晚都要我早瞓過佢,使我睡著唔駛俾佢鼻鼾嘈醒。

我好幸福,因為有人肯為我結婚嗰日做伴娘,但只係响一個星期前才被通知。

我好幸福,因為我份工同老公都可以响香港,好多人都要北上工作,家庭未必可以跟埋一齊。

我好幸福,因為雖然星期一至五做到隻積咁,但星期六唔駛返工。

我好幸福,因為我可以去戲院睇西片時,聽到Tom Hanks把聲講英文,唔係阿唔知乜水把聲講普通話。

我好幸福,因為我啲朋友仲肯做我friend, even我成日唔記得佢哋生日,約會,應承俾帶俾佢哋嘅嘢,喜歡啲乜,秘密……。

我好幸福,因為我有”少年痴呆症”,唔開心嘅嘢(包括同人鬧交,俾人鬧 etc),第二日就忘記得一乾二淨,比起用刷膠刷走啲字,更無痕跡。

我好幸福,因為我細佬兩隻百厭星香蕉仔經常响電話度話唔想同姑媽講電話,但又要求姑媽買Thomas玩具俾佢,累佢姑媽淨係郵費都可以買多幾十套衫。

我好幸福,但無時間寫哂….

有gun定無gun?

前日校園槍擊事件真係好多人談論,無論報紙、博客、電台等,都發表唔同嘅觀點同評論。

我睇ABC網絡,最多談論就係鎗械法例管制問題,討論區有唔同人對應該放寬or更嚴厲管制買槍械。持放寬態度者,認為能更有效自身保護,舉證如"如果其他人都槍,咁就唔會有咁多校園槍擊,亦少啲無辜人士,因為有槍可以自衛,槍手亦會怕對方還擊…"。

我承認世界比以前更危險,無論校園、工作場所、甚至食飯、商場、總之有人嘅地方就有危險,甚至無人嘅地方就更加危險。但我絕對唔認為,多啲人有槍就會安全啲。伊拉克夠多人有槍啦!係我甚至懷疑,如果當時真係有人有槍,他/她會否真係引起幫助?可能已經嚇死,又或者連支槍都俾槍手搶埋添。

究竟,有槍定無槍好? 我就希望.....

從前?

從前响一個冰天雪地嘅鬼地方生活咗N年,以為從此就成為冰人(唔係媒人呀!),擁有無懼冰冷之軀。點知,返香港幾年後,就怕凍怕得不得了。

從前因考會考時考得唔好,所以覺得以後都無法有上大學嘅一日。點知,兜兜轉轉,總算碩士畢業(雖然成績依然唔好,所有嘅嘢都無吸收過,當然碩士亦非代表到啲乜嘢)。

從前俾男朋友飛過,佢仲要一腳踏兩船,以為以後都唔會遇上真心對我嘅人。點知,遇上咗佢,仲會夠膽响N咁多人面前承諾照顧我一生一世嘅人(可能未知個Liability account係無底深潭)。

從前以為世界係公平公正嘅。點知,原來7百萬人之中,只係有800人有話事嘅權利,咁點解香港政府唔係淨問呢800人交稅呢?

從前…可能只可以適用於從前…

平等?

今日睇咗一個人哋嘅blog,唔係好完全記得寫嘅句子,但大意係講某貴婦話不知道什麼是好東西,只知道喜歡什麼東西,智者就恭喜佢(當然係反)，因為佢嘅觀點同野獸相同。我嘅interpretation，其實現今好多人都如貴婦一樣,claim自己率性行事，至於後果of率性行事,就對唔住嘞,我無錯!人其實越想脫離野獸層面,所以學習尊貴,尋求真善境界,反而越退化(達以文可能因此被激死),似乎人嘅獸性太強。

我今晚親身有另一相反版本,話說我返屋企嘅時候,有一位媽咪帶同一個小朋友趕入電梯,小朋友入電梯後發問好多問題,好可愛,引起我望一望佢,原來係一個唐氏綜合症小朋友。突然間,我覺得我其實岐視緊佢。因為我知道佢係唐氏之後,我好似自然哋笑多啲。

响我哋叫做"高等教育"嘅訓練下,好似會好自然咁對一啲俾自己"次一點",或"無咁好彩"嘅一羣'特別照顧'一點,我哋係咪好似一隻野獸扮人咁樣。其實,算唔算對佢哋"唔平等"呢?

出差?

可能有啲人會響往份工可以有差出,工作之餘又可以遊覽唔同地方。其實,我真係就麻麻地喜歡。第一,本人出差地通常都係大陸,自從中學某一年跟屋企上廣州一次,目睹有人被打至頭破血流,有一堆公安圍觀下而無作出任何動作,我就响嗰一刻決定唔會再去大陸作任何旅遊。但天意弄人,依家經常要上大陸如北京、上海等地。

依家大陸當然跟以前唔一啦!都唔駛點講,淨係講酒店,上海酒店價錢都貴好多。記得以前(大約八年前),上海揚子江飯店只係US$99(+tax),前年好似要US$198 (+tax),人工收入當然無酒店房升得咁勁,但由以前RMB3,xxx一位上海大學畢業生到依家RMB6,xxx or more,都好厲害,當然,同香港人力資源市場嘅薪酬仲有一段距離。

講返轉頭,另一樣我唔喜歡出差係因為生理因素。M嚟時要出差當然會難受(我亦聽過好多女仔會先打針,so that出差時唔會有),但我自己返而問題不大。我最大問題係瞓得唔好,瞓咗等同無瞓一樣,通足幾晚頂嘅感受,真係難受到死。

結婚的疑惑?

有朋友A將會响年底結婚。佢本身對結婚嘅形式好憧憬,時時希望係最完美。奈何佢未婚夫係實際形,所以磨擦同嘈交不少。有好多時候,朋友 A 質疑未婚夫是否愛佢,甚至質疑佢自己係唔係做緊錯誤決定。換咗我係佢,同樣情況,可能心情想法都係一樣。

可幸自己當時唔係太多衝擊,可能因為天生懶惰,所以只target最簡單,最經濟為原則,反而因為老公對影相有要求(因以前佢最大嗜好係影嘢,但因不幸認識咗佢依家嘅老婆,又懶又討厭影相,所以已經失去從前嘅才華,邊個話愛一個人唔會改變?活生生慘無人道例子响內子生命裡頭發生),所以有啲budget上嘅爭執。整體嚟講,都唔算太多爭執。

我仲好記得我老公講:「好彩你唔係有好多要求啫。」哈!依家諗起,其實係唔係'蠢'多過真係無乜要求呢?唉!算啦!我老公娶么着我呢種老婆,都係還債多過有so,佢下半世都有排捱,我又何苦在乎嗰幾個星期嘅光輝or排場,哈哈!

不過,我老公真係好錫我嫁,咪話我係度哂幸福。有時,一時嘅執着,可能會帶嚟永遠嘅後悔,咁,又何苦呢?

寄望我嗰個朋友A識諗啦!

轉工=揾老公?

近排好煩惱揾工,因為公司好有可能將香港Operation摺埋。'襯'公司未動前,都想為自己打算一吓。

其實都响公司做咗好多好多年,所以對出面市場都唔了解,只可以用依家間公司做baseline。亦可能因為咁,覺得出面實在比唔上,又覺一動不如一靜,睇定啲先,攪到好似揾老公咁,好耐都仲Single。

諗吓,其實兩者都有相似嘅地方。有啲人騎牛揾馬,就好似拖住一個先,然後再揾個好啲。有啲唔會妥協,唔啱唔要,始終要等個適合嘅。有啲因前度(baseline)永遠美好,所以總覺唔順眼,又揾唔到。當然,'工'同'公'唔一樣啦!'工'係可以轉,'公'就難轉,响我立場,'公'係無可能轉添。

同場加映:有朋友問一個問題,無答案-假如你响一個菜園行,只有一條直路and仲係one way,你只可摘一棵菜each time,如果你唔摘,你只可以向前行,無得返轉頭摘返之前嗰棵,你嘅strategy係…

大人和小孩的分別?

又開始了"煲劇"快速版生活。阿四非常非常喜歡煲劇,此癖好係從"鬼地方非人生活"嘅讀書時期開始。有朋友更番睇"他來自江湖"幾廿次(成套喎),一有新朋友上佢apartment,話未睇過嘅話,好!再來一次。唉!返咗香港,就對日劇愛不釋手。

講番套日劇,故仔好簡單,講一個因無愛情而寄情於其廣告工作嘅靚女,但(又係)因機緣關係,認識一個其中原本無心工作嘅男仔。

呢個入世未深嘅男仔成日俾廣告公司老細教訓。响一幕講呢個男仔因太直率而頂撞老細,男仔死都唔say sorry,唯有佢嘅team leader靚女同人道歉啦。咁、個老細就問個男仔:「你知道大人同小孩嘅分別嘛?」,答案係:「小孩唔會為自己做錯事道歉,大人會為自己無做嘅事而道歉。」

另一幕係講個男仔向大佢幾嘅靚女告白,當然個靚女唔想太揚啦,但個男仔以為個靚女嫌棄佢。於是又整幕老細教仔:「阿仔,你又知唔大人同小孩分別?小孩有時會將"愛"變成對方嘅包袱,大人會由得對方去感佢嘅"愛",唔去強求。」

當然,大人同小孩分別,唔係用年歲計。上述可以用作其中一纇分別方法,雖然好似有啲灰,但長大真係有好多時俾殘酷世界"磨"得好慘,所以能保留一部份赤子之心,先可以唔使入精神病院。

回憶好冷？

剛剛响人哋個blog留言，因為佢講以前响楓葉國一個埠仔讀書，等我以為係同我一樣响非人之地生活潻

回憶起嗰時，真係好佩服自己，零下三十到六十度，一年中有十個月係冬天，我係點過呢？我啲朋友又點過呢？等我慢慢諗吓先．．．．

原諒?

有朋友A响自己個blog度至少3次提到不能原諒另一位B小姐對佢作出嘅傷害。

阿四一向係情緒垃圾站,得蒙友人錯愛,開心同唔開心都會講俾阿四知,亦略知友人好嬲B小姐嘅原因。其中一樣係B小姐散佈A謠言但謠言非真實,另一樣係令A結婚當日有遺憾。

我唔講B小姐啱定錯,但我好担心A。放唔低真係一件非常非常痛苦嘅事。反觀A個blog相對少啲講番佢同啲其他friends嘅開心事。人係咪善忘好啲呢?不過,針唔拮到肉,阿四可能唔知痛。唉!

假腳?

阿四一向懶崇尚自然,胭脂水粉都唔搽,所以一向師奶樣(其實係懶,唔去學,所以都羡慕啲化裝化得好同靚既人。好彩唔係返中環,唔係就PK)。更唔會有唔屬於本來身體物件(因為怕死,怕做手術)

但阿四有一樣嘢係假既,就係隻腳。阿四只係有好多人都可能有既問題,就係 - 扁平足。如果行街多過兩個鐘,嘩!痛死囉。所以阿四唔可以好似其他女仔咁,enjoy行街買嘢。

阿四要用鞋墊做人,鞋墊有分唔駛訂做或要訂做。睇吓你隻腳同個norm 相差幾多個Sigma。訂一"隻"係要千幾蚊架陰公。呢啲又無得claim津貼,慘!!

Blue Ray?

星期六老公帶我去行街街，經過Sony Store，佢好有興趣嗰架４２吋、１０８０p 嘅Bravia電視。電視demo緊嗰套００７Casino Royale，用緊Blue Ray播。老公好興奮咁話：“睇吓！好鬼清呀！！”

我心一沉：‘閉！可能破財！’唯有响臨死之前認清楚個殺人兇手。唔望尢自可，嘩！好鬼清，我老公問得唔得，我話：“你望吓週圍，再望吓個電視。”我老公話：“做物？個電視好清呃！”我話：“係囉！連週圍現實世界都無個電視咁清。”

係真嘅，無可置疑，真係好清。我唔係因為怕我破財而特登講啲咁嘅嘢。有時我諗：人駛唔駛去到咁盡。可能其他人認為係Creativity，但我呢啲平凡人一世都唔會明。

搵工?

之前講想轉工,其實都搵左幾耐咯.大大話話都一年多.都見左十幾二十份(包括agents).有幾份offer但係覺得唔係好得 (請勿誤會晒命), 阿四有自知之明,幾份都係想搵人收拾爛檔, 阿四能力不足,根本無信心收拾到.況且阿四未水滲眼眉,所以好似唔係好甘心.最後,到依家都未轉到工囉! 抵死!

不過搵工都有啲野學,有時嗰啲HR都好攪笑.有次星期五晚7:00左右,有間我都好想去既某大公營機構HR打嚟話: “阿四 (當然係叫我真名),你星期一上午十點過嚟interview” 嘩! 你叫我點即刻請假呀?貴公司星期六都唔駛返工啦! 唔通我啲阿四feel(永無say no)真係咁明顯?連睇份CV都感受到？我無响我份CV呃你話我唔駛做喎.明明寫住 “Year 20XX to present”. 但因都好想去呢間公司，所以即管好客氣咁問：“對唔住呀！星期一我趕唔切請假，可唔可以改第二日？”點知阿姐姐話：“無喎！咁你即係唔嚟得啦！”嘩！俾佢吹到啤啤聲．

我諗响佢個blog可能都一樣話有個茂利有工都唔去見，响佢角度，可能覺得個茂利（即我）浪費佢時間，Anyways,呢間公司後嚟管理層因俾公眾鬧到要空降個新阿頭，然後高層攪左一大堆小動作．終於高層大執位，無得留低．

開blog大吉

呢幾輪都好想轉工，其實，以自己嗰種“天下無敵，慳水慳力”性格（一字記之：懶！），點會捨得郁．之不過公司有向上（北）心態，我配合唔到啫！當兩人既心態唔一樣，走埋一齊都應該無幸福．

咪睇我好似唔盡力挽留呢段關係．有時唔係要相方遷就就有得解決．大家要求唔一樣，根本就似我嗰friend 話：地球人同火星人講野．

當初如果唔係咁，我諗呢份工係我唯一，亦係終生既公司．嘩！好似同初戀情人共偕白首一樣．咪笑我天真，呢間美國公司真係出名員工由細做到大．近乎生養死葬，好鬼得！依家，咁攪法啲Stakeholders咪話你唔識做生意囉．我之前就好有心機，做一個心甘命抵既阿四幫公司.

我真係唔係要怪公司．只不過講出有啲唔開心唔可以共偕白首啫！話說回來，公司同事個個都唔錯，當然有小部份係火星人啦．但OK啦!有機會都可以講吓啲火星人生活．

點開始？

好想寫吓野,從來唔知點開始.見到友輩開始建立自己既blog, 好鬼心痕. 唔..我諗, 首先改番個好blog名先.

叫物鬼好?

如是者,一年復一年,有blog的話,都恐怕一blog都系老鼠呀,曱甴呀咁, 都咪話唔恐怖!!

今年唯有”的”起心肝, 寫吓blog啦!!但…叫物鬼好? 突然個腦好似見貞子咁浮出～～～阿四～～，唔係嫲！！咁邪!